|
Aisling ghéar do dhearcas féin
ar leaba 's mé go lagbhríoch
an ainnir shéimh darbh ainm Éire
ag teacht im ghaor ar marcaíocht,
a súile glas, a cúl tiubh casta,
a com ba gheal 's a mailí,
dá mhaíomh go raibh ag tíocht 'na gar
a díogras, Mac an Cheannaí
A beol ba bhinn, a glór ba chaoin,
is ró-shearc linn an cailín,
céile Bhriain dár ghéill an Fhiann,
mo léirchreach dhian a haicíd:
fá shúistibh Gall dá brú go teann,
mo chúileann tseang 's mo bhean ghaoil;
beidh sí 'na spreas, an rí-bhean deas,
go bhfillfidh Mac an Cheannaí.
Na céadta tá i bpéin dá grá,
le géarshearc shámh dá cneas mhín,
clanna ríthe, maca Míle,
dragain fhíochta is gaiscígh;
gnúis ná gnaoi ní mhúsclann sí
cé dubhach fá scíos an cailín -
níl faoiseamh seal le tíocht 'na gar
go bhfillfidh Mac an Cheannaí.
A ráite féin, is cráite an scéal,
mo lánchreach chlé do lag sinn,
go bhfuil sí gan cheol ag caoi na ndeor,
's a buíon gan treoir gan maithghníomh,
gan fiach gan feoil, i bpian go mór,
'na hiarsma fó gach madaí,
cnaoite lag ag caoi na ndearc
go bhfillfidh Mac an Cheannaí.
Adúirt arís an bhúidhbhean mhíonla
ó turnadh ríthe 'chleacht sí,
Conn is Art ba lonnmhar reacht,
ba foghlach glac i ngleacaíocht,
Críomhthainn tréan tar toinn tug géill
is Luighdheach mac Céin an fear groí,
go mbeadh sí 'na spreas gan luí le fear
go bhfillfeadh Mac an Cheannaí.
Do-bheir súil ó dheas gach lá fá seach
ar thráigh na mbarc an cailín
is súil deas-soir go dlúth tar muir,
mo chumha anois a haicíd,
a súile siar ag súil le Dia,
tar tonntaibh fiara gainmhe;
cloíte lag beidh sí gan phreab
go bhfillfidh Mac an Cheannaí.
A bráithre breaca táid tar lear,
na táinte shearc an cailín;
níl fleadh le fail, níl gean ná grá
ag neach dá cairdibh, admhaím;
a gruanna fliuch, gan suan gan sult,
fá ghruaim is dubh a n-aibíd,
's go mbeidh sí 'na spreas gan luí le fear
go bhfillfidh Mac an Cheannaí.
Adúrtsa léi ar chlos na scéal,
i rún gur éag do chleacht sí,
thuas sa Spáinn go bhfuair an bás -
's nár thrua le cách a ceasnaí?
ar chlos mo ghotha i bhfogas di
chorraigh a cruth 's do scread sí
is d'éalaigh an t-anam d'aonphreib aisti -
mo léansa an bhean go neamhbhríoch.
|